પાંચાળી નો પોકાર

 પાંચાળી નો પોકાર

શું બેઠાં તમે હું તો શરમાઉ છું

થાંભલા આભના પુત્રવધુ થાઉં છું.

અધર્મી સભામાં બહું અકળાઉ છું

પાંચ ધાર્યા પછી હવે પસ્તાવ છું

પાપીઓ આમ આ ચોટલો પકડશે

ધક્કા દઇ આમની તેમની ઢરડશે

પાંડવો પાંપણો ઢાળીને પરખશે 

નોતી ખબર આવા નમાલા નિવડશે

અકલ જાતી રહી સભાસદ આપની

પૂરી ભરાણી ઘડી શું પાપની

બુધ્ધિ મારી ગઈ વયોવૃદ્ધ બાપની

કે ઘડી આવી શું અજબ ઉત્પાતની !

ભારેલો અગ્નિ ઓચિંતો ભભુકશે

વાગડદૌ વાગડદૌ બુગીઓ વગડશે

અટંકા વિરલા જંગમાં ઉપડશે

ભેળું કરેલું કોણ આ ભોગવશે !

કાચ ફુટ્યા પછી કહો શું સાન્ધવુ !

કમર ભાંગ્યા પછી હોય શું કામવુ !

રહે નહીં ખાનારૂ પછી શું રાંધવું !

બાપનું કરીને ભેળું શું બાન્ધવુ !

સમજી જવાય તો હજી પણ સાર છે

અલ્પ છે રોગ ત્યાં સુધી ઉપચાર છે

લાગતો હોય આ જુઠો પ્રચાર તે

તો વાર ઝાઝી નથી મેદાન તૈયાર છે.

              --- પિંગળશીભાઇ ગઢવી